Reading Time: 6 minutes

ತಜ್ಞರ ವಿಮರ್ಶೆ – ಅಶ್ವಿನಿ ಎಸ್. ಕಾನಡೆ, ನೊಂದಾಯಿಸಿದ ಡಯಟಿಶಿಯನ್ ಮತ್ತು 17 ವರ್ಶ ಅನುಭವ ಹೊಂದಿರುವ ಪ್ರಮಾಣಿಕರಿಸಲಾದ ಡಯಾಬಿಟಿಸ್ ಶಿಕ್ಷಣತಜ್ಞರು

ವಾಸ್ತವಗಳನ್ನು ವಿಮರ್ಶಿಸಿದವರು ಅದಿತ್ಯ ನಾರ್, ಬಿ.ಫಾರ್ಮ್, ಎಂಎಸ್‍ಸಿ. ಸಾರ್ವಜನಿಕ ಆರೋಗ್ಯ ಮತ್ತು ಆರೋಗ್ಯ ಅರ್ಥಶಾಸ್ತ್ರ

ನೀವು ಹೊಸದಾಗಿ ಡಯಾಬಿಟಿಸ್‍ಗೆ ಚಿಕಿತ್ಸೆ ಪಡೆಯುತ್ತಿದ್ದರೆ ಅಥವಾ ಕೆಲವು ವರ್ಷಗಳಿಂದ ಅದನ್ನು ನಿಭಾಯಿಸುತ್ತಿದ್ದರೆ, ಅದನ್ನು ನಿರ್ವಹಿಸುವ ಅತ್ಯುತ್ತಮ ಮಾರ್ಗವೆಂದರೆ ಚಿಕಿತ್ಸೆಯಲ್ಲಿ ಏನಿದೆ ಎಂಬುದರ ಬಗ್ಗೆ ಸರಿಯಾಗಿ ತಿಳಿಯುವುದು. ಡಯಾಬಿಟಿಸ್ ನಿರ್ವಹಣೆಯಲ್ಲಿ ಇನ್ಸುಲಿನ್ ಪಾತ್ರದ ಬಗ್ಗೆ ಹೆಚ್ಚಿನ ಜನರಿಗೆ ತಿಳಿದಿದ್ದರೂ, ತಳಮಟ್ಟದ ಮಾಹಿತಿಯ ಹೊರತಾಗಿ ಅನೇಕರಿಗೆ ಇದರ ಬಗ್ಗೆ ಹೆಚ್ಚು ತಿಳಿದಿಲ್ಲ.

ಹಾಗಾಗಿ, ಡಯಾಬಿಟಿಸ್ ಹೊಂದಿರುವ ಪ್ರತಿಯೊಬ್ಬ ವ್ಯಕ್ತಿಯು ಇನ್ಸುಲಿನ್ ಬಗ್ಗೆ ತಿಳಿದುಕೊಳ್ಳಬೇಕಾದ ಕೆಲವು ಪ್ರಮುಖ ವಿವರಗಳು ಯಾವುವು? ಅವುಗಳನ್ನು ತಿಳಿದುಕೊಳ್ಳೋಣ.

ಇನ್ಸುಲಿನ್ ಎಂದರೇನು?

ನೀವು ಸೇವಿಸುವ ಆಹಾರದಲ್ಲಿನ ಕಾರ್ಬೋಹೈಡ್ರೇಟ್‌ಗಳನ್ನು ನಿಮ್ಮ ಜೀರ್ಣಾಂಗ ವ್ಯವಸ್ಥೆ ಗ್ಲುಕೋಸ್‌ಗಳಾಗಿ ವಿಭಜಿಸುತ್ತದೆ. ನಿಮ್ಮ ಮೇದೋಜ್ಜೀರಕ ಗ್ರಂಥಿಯಿಂದ ಉತ್ಪತ್ತಿಯಾಗುವ ಇನ್ಸುಲಿನ್ ಎಂಬ ಹಾರ್ಮೋನ್ ಈ ಗ್ಲುಕೋಸನ್ನು ಹೀರಿಕೊಳ್ಳಲು ಜೀವಕೋಶಗಳಿಗೆ ಸಹಾಯ ಮಾಡುತ್ತದೆ ಮತ್ತು ನಿಮ್ಮ ದೇಹದಲ್ಲಿನ ಕಾರ್ಬೋಹೈಡ್ರೇಟ್ ಮತ್ತು ಕೊಬ್ಬಿನ ಮೆಟಬಾಲಿಸಮನ್ನು ನಿಯಂತ್ರಿಸುತ್ತದೆ.

ಟೈಪ್ 1 ಡಯಾಬಿಟಿಸ್‌ನಲ್ಲಿ, ದೇಹವು ಇನ್ಸುಲಿನ್ ಅನ್ನು ಉತ್ಪಾದಿಸುವುದೇ ಇಲ್ಲ, ಆದರೆ ಟೈಪ್ 2 ಡಯಾಬಿಟಿಸ್‌ನಲ್ಲಿ, ದೇಹವು ಸಾಕಷ್ಟು ಪ್ರಮಾಣದಲ್ಲಿ ಇನ್ಸುಲಿನ್ ಅನ್ನು ಉತ್ಪಾದಿಸುವುದಿಲ್ಲ ಅಥವಾ ಅದು ಉತ್ಪಾದಿಸುವ ಇನ್ಸುಲಿನ್ ಅನ್ನು ಪರಿಣಾಮಕಾರಿಯಾಗಿ ಬಳಸಲು ಸಾಧ್ಯವಾಗುವುದಿಲ್ಲ. ಹಾಗಾಗಿ, ಇನ್ಸುಲಿನ್ ಔಷಧಿ ಹೆಚ್ಚಿನ ಸಂದರ್ಭಗಳಲ್ಲಿ ಚಿಕಿತ್ಸೆಯ ಅನಿವಾರ್ಯ ಭಾಗವಾಗುತ್ತದೆ.

ಯಾರಿಗೆ ದೇಹದ ಹೊರಗಿನಿಂದ ಇನ್ಸುಲಿನ್ ಅನ್ನು ನೀಡಬೇಕಾಗುತ್ತದೆ?

ನಿಮ್ಮ ದೇಹವು ಸಾಕಷ್ಟು ಇನ್ಸುಲಿನ್ ಉತ್ಪಾದಿಸಲು ವಿಫಲವಾದಾಗ, ಅದರ ಕೊರೆತೆಯನ್ನು ತುಂಬಲು ಔಷಧದ ವಿಧಾನವನ್ನು ಬಳಸಲಾಗುತ್ತದೆ. ಹೆಚ್ಚಿನ ಸಂದರ್ಭಗಳಲ್ಲಿ, ಇನ್ಸುಲಿನ್ ಚಿಕಿತ್ಸೆಯನ್ನು ವೈದ್ಯರು ಈ ಕೆಳಗಿನ ಸಂದರ್ಭಗಳಲ್ಲಿ ಸೂಚಿತ್ತಾರೆ:

  • ನಿಮಗೆ ಟೈಪ್ 1 ಡಯಾಬಿಟಿಸ್ ಇದ್ದರೆ
  • ನಿಮಗೆ ಅನಿಯಂತ್ರಿತ ಟೈಪ್ 2 ಡಯಾಬಿಟಿಸ್ ಇದ್ದರೆ,[1]
  • ನಿಮ್ಮ ಆಹಾರ, ವ್ಯಾಯಾಮ ಮತ್ತು ಬಾಯಿಯ ಮೂಲಕ ತಗೆದುಕೊಳ್ಳುವ ಔಷಧಿಗಳು ರಕ್ತದಲ್ಲಿನ ಸಕ್ಕರೆಯ ಮೇಲೆ ಸಾಕಷ್ಟು ನಿಯಂತ್ರಣವನ್ನು ಸಾಧಿಸುವಲ್ಲಿ ವಿಫಲವಾದರೆ,[2]
  • ನಿಮಗೆ ಟೈಪ್ 1 ಅಥವಾ ಟೈಪ್ 2 ಡಯಾಬಿಟಿಸ್ ಇದ್ದು ಮತ್ತು ನೀವು ಗರ್ಭಿಣಿಯಾದರೆ,[2]
  • ನಿಮಗೆ ಟೈಪ್ 1 ಅಥವಾ ಟೈಪ್ 2 ಡಯಾಬಿಟಿಸ್ ಇದ್ದು ಮತ್ತು ನೀವು ಶಸ್ತ್ರಚಿಕಿತ್ಸೆಗೆ ಒಳಗಾಗುತ್ತಿದ್ದರೆ,[3]

ಟೈಪ್ 2 ಡಯಾಬಿಟಿಸ್ ಹೊಂದಿರುವವರಿಗೆ ಇನ್ಸುಲಿನ್ ಏಕೆ ಬೇಕು?

ಸಾಮಾನ್ಯವಾಗಿ, ಟೈಪ್ 2 ಡಯಾಬಿಟಿಸನ್ನು ನಿಯಂತ್ರಿಸಲು ಹಂತ ಹಂತವಾಗಿ ಹಲವು ವರ್ಷಗಳಿಂದ, ಬಾಯಿ ಮೂಲಕ ತಗೆದುಕೊಳ್ಳುವ ವಿವಿಧ ಔಷಧಿಗಳ ಜೊತೆಗೆ ಆರೋಗ್ಯಕರ ಆಹಾರ ಮತ್ತು ವ್ಯಾಯಾಮವನ್ನು ಸೂಚಿಸಲಾಗುತ್ತದೆ.

ರಕ್ತದಲ್ಲಿನ ಸಕ್ಕರೆ ಮಟ್ಟವನ್ನು ನಿಯಂತ್ರಿಸಲು ಸಾಮಾನ್ಯವಾಗಿ ಬಾಯಿಂದ ಔಷಧಿಗಳನ್ನು ತಗೆದುಕೊಳ್ಳುವುದರ ಮೂಲಕ ಚಿಕಿತ್ಸೆ ಪ್ರಾರಂಭವಾಗುತ್ತದೆ. ಆದರೂ, ಡಯಾಬಿಟಿಸ್ ನಿಯಂತ್ರಣಕ್ಕೆ ಬಾರದಿದ್ದಲ್ಲಿ ಅಥವಾ ತದನಂತರದಲ್ಲಿ ಔಷಧವು ನಿರೀಕ್ಷಿಸಿದ ಪರಿಣಾಮವನ್ನು ಬೀರದಿದ್ದಲ್ಲಿ, ಮುಂದಿನ ಹಂತವು ಬಾಯಿಂದ ತಗೆದುಕೊಳ್ಳುವ ಹಲವು ಔಷಧಿಗಳ ಸಂಯೋಜನೆಯಿಂದ ಕೂಡಿರುತ್ತದೆ, ಅದು ಹೆಚ್ಚು ಪರಿಣಾಮಕಾರಿಯಾಗಿ ಕಾರ್ಯನಿರ್ವಹಿಸುತ್ತದೆ.

ರಕ್ತದಲ್ಲಿನ ಸಕ್ಕರೆಯ ಪ್ರಮಾಣವನ್ನು ನಿಯಂತ್ರಿಸಲು ಬಾಯಿಯ ಮೂಲಕ ತಗೆದುಕೊಳ್ಳುವ ಔಷಧಿ, ಆಹಾರ ಪದ್ಧತಿ ಮತ್ತು ವ್ಯಾಯಾಮ ಸಾಕಾಗದೇ ಇರುವಾಗ ಟೈಪ್ 2 ಡಯಾಬಿಟಿಸ್ ಹೊಂದಿರುವವರಿಗೆ ಇನ್ಸುಲಿನ್ ಚಿಕಿತ್ಸೆಯ ಅಗತ್ಯವಿರುತ್ತದೆ.[4]

ಆದರೆ, ಇನ್ಸುಲಿನ್ ಅನ್ನು ಕೊನೆಯ ಹಂತವಾಗಿ ಮಾತ್ರ ಬಳಸಲಾಗುವುದಿಲ್ಲ. ವಾಸ್ತವವಾಗಿ, ಇತ್ತೀಚಿನ ಚಿಕಿತ್ಸೆಯ ಮಾರ್ಗಸೂಚಿಗಳ ಶಿಫಾರಸ್ಸಿನ ಪ್ರಕಾರ ಟೈಪ್ 2 ಡಯಾಬಿಟಿಸ್ ಹೊಂದಿರುವ ಜನರು ಎಷ್ಟು ಬೇಗ ಇನ್ಸುಲಿನ್ ತೆಗೆದುಕೊಳ್ಳಲು ಪ್ರಾರಂಭಿಸುತ್ತಾರೋ, ಅಷ್ಟು ಒಳ್ಳೆಯದು. ನೀವು ಟೈಪ್ 2 ಡಯಾಬಿಟಿಸ್‌ನಿಂದ ಹೊಸದಾಗಿ ಚಿಕಿತ್ಸೆ ಪಡೆಯುತ್ತಿದ್ದರೆ, ಹಾಗು ನಿಮಗೆ ಈ ಕೆಳಗಿನ ಲಕ್ಷಣಗಳಿದ್ದರೆ, ವೈದ್ಯರು ನಿಮಗೆ ಇನ್ಸುಲಿನ್ ಚಿಕಿತ್ಸೆಯ ಸಲಹೆ ನೀಡಬಹುದು:[2]

  • ಹೆಚ್ಚು ಸಕ್ಕರೆಯ ಮಟ್ಟದ ಲಕ್ಷಣಗಳು, ಅತಿಯಾದ ಬಾಯಾರಿಕೆ (ಪಾಲಿಡಿಪ್ಸಿಯ), ಹೆಚ್ಚು ಪ್ರಮಾಣದಲ್ಲಿ ಮೂತ್ರವನ್ನು ಮಾಡುವುದು (ಪಾಲಿಯೂರಿಯ), ಮಂತಾದವು.
  • ಮತ್ತು / ಇಲ್ಲವೇ ಗ್ಲೈಕೋಸೈಲೇಟೆಡ್ ಹಿಮೋಗ್ಲೋಬಿನ್ (HbA1c)> 10% ಇದ್ದರೆ
  • ಮತ್ತು / ಇಲ್ಲವೇ ಅತಿ ಹೆಚ್ಚು ರಕ್ತದಲ್ಲಿನ ಗ್ಲುಕೋಸ್ ಮಟ್ಟ (> 300 mg/d) ಇದ್ದರೆ

ಹೊಸದಾಗಿ ಚಿಕಿತ್ಸೆ ಪಡೆದ ಟೈಪ್ 2 ಡಯಾಬಿಟಿಸ್‌ ರೋಗಿಗಳಿಗೆ ಆರಂಭದಲ್ಲಿ ನೀಡಲಾಗುವ ತೀವ್ರವಾದ ಇನ್ಸುಲಿನ್ ಚಿಕಿತ್ಸೆಯು ಮೇದೋಜ್ಜೀರಕ ಗ್ರಂಥಿಯ ಕಾರ್ಯವನ್ನು ಪುನಃಸ್ಥಾಪಿಸಲು ಸಹಾಯ ಮಾಡುವುದಲ್ಲದೇ ದೀರ್ಘಕಾಲದ ಡಯಾಬಿಟಿಸ್ ನಿವಾರಣೆಗೆ ಸಹಾಯಮಾಡುತ್ತದೆ ಎಂದು ವೆಂಗ್ ಜೆ, ಮತ್ತು ಇತರರು ನಡೆಸಿದ ಅಧ್ಯಯನವು ತೋರಿಸಿದೆ.[5]

ಇನ್ಸುಲಿನ್ ಚಿಕಿತ್ಸೆಯು ಹೇಗೆ ಸಹಾಯ ಮಾಡುತ್ತದೆ?

ನಿಮ್ಮ ಮೇದೋಜ್ಜೀರಕ ಗ್ರಂಥಿಯಿಂದ ಬಿಡುಗಡೆಯಾಗುವ ಇನ್ಸುಲಿನ್ ನಿಮ್ಮ ರಕ್ತದಲ್ಲಿನ ಸಕ್ಕರೆಯನ್ನು ಸಾಮಾನ್ಯ ಮಟ್ಟದಲ್ಲಿರಿಸುತ್ತದೆ. ಸಕ್ಕರೆ ಮಟ್ಟಕ್ಕೆ ನಿಮ್ಮ ದೇಹದ ಪ್ರತಿಕ್ರಿಯೆ ತನ್ನಿಂದ ತಾನೇ ಆಗುತ್ತದೆ. ಗ್ರಂಥಿಯೂ ದಿನಪೂರ್ತಿ ಹಿನ್ನೆಲೆಯಲ್ಲಿ ಕೆಲಸ ಮಾಡುವ ಇನ್ಸುಲಿನ್ (ಬೇಸಲ್ ಇನ್ಸುಲಿನ್) ಅನ್ನು ಬಿಡುಗಡೆ ಮಾಡಿ ರಾತ್ರಿಯಿಡೀ ಮತ್ತು ಊಟದ ಮಧ್ಯದಲ್ಲಿ ಸಕ್ಕರೆಯ ಮಟ್ಟವನ್ನು ನಿಯಂತ್ರಣದಲ್ಲಿಡುವಂತೆ ಮಾಡುತ್ತದೆ. ನೀವು ತಿನ್ನುವಾಗ, ನಿಮ್ಮ ಆಹಾರದಲ್ಲಿನ ಸಕ್ಕರೆಯ ಹೀರುವಿಕೆಗೆ ಪ್ರತಿಯಾಗಿ ಹಾಗು ತ್ವರಿತವಾಗಿ ಕೆಲಸ ಮಾಡುವ ಇನ್ಸುಲಿನ್ (ಬೋಲಸ್ ಇನ್ಸುಲಿನ್) ಅನ್ನು ಉತ್ಪಾದಿಸುತ್ತದೆ.

ಚುಚ್ಚುಮದ್ದಿನ ಅಥವಾ ಇನ್ಸುಲಿನ್ ಪಂಪ್ ಮೂಲಕ ತೆಗೆದುಕೊಂಡ ಇನ್ಸುಲಿನ್ ನೈಸರ್ಗಿಕ ಇನ್ಸುಲಿನ್‌ನಂತೆಯೇ ಪರಿಣಾಮವನ್ನು ಬೀರುತ್ತದೆ. ಇದು ಸಾಮಾನ್ಯ ಇನ್ಸುಲಿನ್ ಮಟ್ಟವನ್ನು ಅಂದಾಜು ಮಾಡುತ್ತದೆ ಮತ್ತು ನಿಮ್ಮ ಅಧಿಕ ರಕ್ತದ ಸಕ್ಕರೆಯನ್ನು ಕಡಿಮೆ ಮಾಡಲು ಸಹಾಯ ಮಾಡುತ್ತದೆ. ಇದನ್ನು ಸಾಧಿಸಲು, ನಿಮ್ಮ ಇನ್ಸುಲಿನ್ ಚಿಕಿತ್ಸೆಯು ಈ ಕೆಳಗಿನವುಗಳನ್ನು ಒಳಗೊಂಡಿರಬಹುದು:

  • ಬೇಸಲ್ ಇನ್ಸುಲಿನ್‍ನ ಹಿನ್ನೆಲೆಯ ಮಾರ್ಪು
  • ಬೋಲಸ್ ಇನ್ಸುಲಿನ್‍ನ ಕ್ವಿಕ್ ಬರ್ಸ್ಟ್ ಮಾರ್ಪು

ಕಣ್ಣುಗಳ (ರೆಟಿನೋಪತಿ), ಮೂತ್ರಪಿಂಡಗಳ (ನೆಫ್ರೋಪತಿ) ಮತ್ತು ನರಗಳ (ನರರೋಗ) ಮೇಲೆ ಡಯಾಬಿಟಿಸ್‌ ತೊಂದರೆಗಳ ಆಕ್ರಮಣವನ್ನು ಮತ್ತು ಅದರ ಪ್ರಗತಿಯನ್ನು ನಿಧಾನಗೊಳಿಸಲು ತೀವ್ರವಾದ ಇನ್ಸುಲಿನ್ ಚಿಕಿತ್ಸೆಯು ಪರಿಣಾಮಕಾರಿ ಎಂದು ಸಂಶೋಧನೆ ತೋರಿಸುತ್ತದೆ.[6]

ವಿವಿಧ ರೀತಿಯ ಇನ್ಸುಲಿನ್‍ಗಳಿವೆಯೇ?

ಐದು ವಿಭಿನ್ನ ರೀತಿಯ ಇನ್ಸುಲಿನ್‍ಗಳಿವೆ. ಈ ಇನ್ಸುಲಿನ್‍ಗಳು ಎಷ್ಟು ವೇಗವಾಗಿ ಕಾರ್ಯನಿರ್ವಹಿಸುತ್ತವೆ ಮತ್ತು ಅವುಗಳ ಪರಿಣಾಮಗಳು ಎಷ್ಟು ಕಾಲ ಉಳಿಯುತ್ತವೆ ಎಂಬುದರಲ್ಲಿ ಅವು ಬೇರೆಯಾಗಿವೆ:[7] 

ತ್ವರಿತ-ಕಾರ್ಯನಿರ್ವಹಿಸುವ ಇನ್ಸುಲಿನ್ಸುಮಾರು 15 ನಿಮಿಷಗಳಲ್ಲಿ ಕೆಲಸ ಮಾಡಲು ಪ್ರಾರಂಭಿಸುತ್ತದೆ. 3 ರಿಂದ 5 ಗಂಟೆಗಳವರೆಗೆ ಇದರ ಪರಿಣಾಮ ಇರುತ್ತದೆ.
ಅಲ್ಪಕಾಲ-ಕಾರ್ಯನಿರ್ವಹಿಸುವ ಇನ್ಸುಲಿನ್ಸುಮಾರು 30 ರಿಂದ 60 ನಿಮಿಷಗಳಲ್ಲಿ ಕೆಲಸ ಮಾಡಲು ಪ್ರಾರಂಭಿಸುತ್ತದೆ. 5 ರಿಂದ 8 ಗಂಟೆಗಳವರೆಗೆ ಇದರ ಪರಿಣಾಮ ಇರುತ್ತದೆ.
ಮಧ್ಯಂತರದಲ್ಲಿ-ಕಾರ್ಯನಿರ್ವಹಿಸುವ ಇನ್ಸುಲಿನ್ಸುಮಾರು 1 ರಿಂದ 3 ಗಂಟೆಗಳಲ್ಲಿ ಕೆಲಸ ಮಾಡಲು ಪ್ರಾರಂಭಿಸುತ್ತದೆ. 12 ರಿಂದ 16 ಗಂಟೆಗಳವರೆಗೆ ಇದರ ಪರಿಣಾಮ ಇರುತ್ತದೆ.
ಧೀರ್ಘಕಾಲ-ಕಾರ್ಯನಿರ್ವಹಿಸುವ ಇನ್ಸುಲಿನ್ಸುಮಾರು 1 ಗಂಟೆಯಲ್ಲಿ ಕೆಲಸ ಮಾಡಲು ಪ್ರಾರಂಭಿಸುತ್ತದೆ. 20 ರಿಂದ 26 ಗಂಟೆಗಳವರೆಗೆ ಪರಿಣಾಮ ಇರುತ್ತದೆ.
ಪ್ರೀಮಿ‍ಕ್ಸಡ್ ಇನ್ಸುಲಿನ್2 ರೀತಿಯ ಇನ್ಸುಲಿನ್‍ಗಳ ಸಂಯೋಜನೆ


ನಿಮ್ಮ ವಯಸ್ಸು, ದೇಹದ ತೂಕ, ಸಕ್ಕರೆ ನಿಯಂತ್ರಣ, ಜೀವನಶೈಲಿ, ಯಾವ ಅಂತರದಲ್ಲಿ ಚುಚ್ಚುಮದ್ದು ತಗೆದುಕೊಳ್ಳಬಹುದು ಎನ್ನುವ ನಿಮ್ಮ ಆದ್ಯತೆ ಮತ್ತು ಇನ್ಸುಲಿನ್‌ಗೆ ನಿಮ್ಮ ಪ್ರತಿಕ್ರಿಯೆಯಂತಹ ಅಂಶಗಳನ್ನು ಅವಲಂಬಿಸಿ ನಿಮ್ಮ ವೈದ್ಯರು ನಿಮಗಾಗಿ ಉತ್ತಮ ರೀತಿಯ ಇನ್ಸುಲಿನ್ ಅನ್ನು ಶಿಫಾರಸು ಮಾಡುತ್ತಾರೆ.

ಇನ್ಸುಲಿನ್ ಅನ್ನು ಹೇಗೆ ನೀಡಲಾಗುತ್ತದೆ?

ಇನ್ಸುಲಿನ್ ತೆಗೆದುಕೊಳ್ಳುವ ಸಾಮಾನ್ಯ ವಿಧಾನವೆಂದರೆ ಸಿರಿಂಜ್‍ನ ಮೂಲಕ. ನಿಮ್ಮ ಚರ್ಮದ ಅಡಿಯಲ್ಲಿರುವ ಕೊಬ್ಬಿನ ಪದರಕ್ಕೆ ಸಿರಂಜ್ ಚುಚ್ಚುವ ಮೂಲಕ ನೀವು ಇನ್ಸುಲಿನ್ ಅನ್ನು ದೇಹದ ಒಳಕ್ಕೆ ಸೇರಿಸಬಹುದು. ನೀವು ಇನ್ಸುಲಿನ್ ಪೆನ್ನುಗಳು ಮತ್ತು ಪಂಪ್‌ಗಳನ್ನು ಸಹ ಬಳಸಬಹುದು.

ಇನ್ಸುಲಿನ್, ಪೆನ್ನುಗಳ ಕಾರ್ಟ್ರಿಡ್ಜ್ ಮತ್ತು ಬದಲಾಯಿಸಬಹುದಾದ ಸೂಜಿಯ ಮೂಲಕ ಹಾರ್ಮೋನನ್ನು ತಲುಪಿಸುತ್ತದೆ. ನಿಮ್ಮ ಅವಶ್ಯಕತೆಗಳಿಗೆ ಅನುಗುಣವಾಗಿ ನೀವು ಡೋಸ್ ಮತ್ತು ಎಷ್ಟು ಬಾರಿ ತೆಗೆದುಕೊಳ್ಳಬೇಕು ಎಂಬುದನ್ನು ಹೊಂದಿಸಿಕೊಳ್ಳಬಹುದು. ಮತ್ತೊಂದೆಡೆ, ಇನ್ಸುಲಿನ್ ಪಂಪನ್ನು ನಿಮ್ಮ ಜೇಬು, ಸೊಂಟದ ಪಟ್ಟಿ, ಬೆಲ್ಟ್ ಅಥವಾ ಒಳ ಉಡುಪುಗಳಿಗೆ ಬೇಕಾದಹಾಗೆ ಜೋಡಿಸಿಕೊಳ್ಳಬಹುದು, ಮತ್ತು ಇದು ನಿಮ್ಮ ಚರ್ಮದ ಕೆಳಗೆ ಇರಿಸಿದ ತೆಳುವಾದ ಕೊಳವೆಯ ಮೂಲಕ ಸ್ಥಿರ ಪ್ರಮಾಣದಲ್ಲಿ ಪೂರ್ವ-ನಿರ್ದೇಶನದಂತೆ ಇನ್ಸುಲಿನ್ ಅನ್ನು ಪೂರೈಸುತ್ತದೆ.

ಇನ್ಸುಲಿನ್ ಚುಚ್ಚುಮದ್ದುಗಳು ನೋವುಂಟುಮಾಡುತ್ತವೆಯೇ?

ಚುಚ್ಚುಮದ್ದುಗಳು ನೋವುಂಟುಮಾಡುವುದಿಲ್ಲ. ಪ್ರಸ್ತುತ ದಿನದಲ್ಲಿನ ಇನ್ಸುಲಿನ್ ಚುಚ್ಚುಮದ್ದುಗಳು ಬಹಳ ಸಣ್ಣ ಸೂಜಿಗಳಾಗಿವೆ ಹಾಗೂ ಚುಚ್ಚುವಿಕೆ ಯಾವುದೇ ನೋವನ್ನು ಉಂಟುಮಾಡುವುದಿಲ್ಲ.

ಆದರೆ ಇನ್ಸುಲಿನ್ ಚುಚ್ಚುಮದ್ದಿನ ಬಗ್ಗೆ ನಿಮ್ಮ ಭಯವು “ಸೈಕಾಲಜಿಕಲ್ ಇನ್ಸುಲಿನ್ ರೆಸಿಸ್ಟೆನ್ಸ್” ಎಂಬ ಸ್ಥಿತಿಯಿಂದ ಉದ್ಭವಿಸಬಹುದು.[8] ಅಂತಹ ಸಂದರ್ಭಗಳಲ್ಲಿ, ನೀವು ಇನ್ಸುಲಿನ್ ಚುಚ್ಚುಮದ್ದು ತಗೆದುಕೊಳ್ಳಲು ಹೆದರಲು ಕಾರಣ ಚುಚ್ಚುಮದ್ದು ನೋವುಂಟುಮಾಡುತ್ತದೆ ಎನ್ನುವ ಹೆದರಿಕೆ ಹಾಗು ಕಡಿಮೆ ರಕ್ತದಲ್ಲಿನ ಸಕ್ಕರೆ ಮತ್ತು ತೂಕ ಹೆಚ್ಚಾಗಬಹುದು ಎನ್ನುವ ಕಾರಣಕ್ಕೆ. ಇನ್ಸುಲಿನ್ ತಗೆದುಕೊಳ್ಳುವುದರಿಂದ ನಿಮ್ಮ ಸ್ಥಿತಿ ಇನ್ನೂ ಹದಗೆಡಬಹುದು ಎನ್ನುವ ಯೋಚನೆಯನ್ನೂ ಮಾಡಬಹುದು, ಮತ್ತು ಈ ವಿಧಾನ ಶಾಶ್ವತವಾಗಿ ನಿಮ್ಮ ಮೇಲೆ ನಿರ್ಬಂಧ ಹೇರುತ್ತದೆ, ಮತ್ತು ಪಾಲಿಸುವುದು ತುಂಬಾ ಕಷ್ಟ ಎನ್ನುವ ಅಸಮಾಧಾನವನ್ನು ನೀವು ಹೊಂದಬಹುದು.

ಚುಚ್ಚುಮದ್ದು ಇಲ್ಲದೆ ಇನ್ಸುಲಿನ್ ತೆಗೆದುಕೊಳ್ಳುವ ದಾರಿಯಿದೆಯೇ?

ಚುಚ್ಚುಮದ್ದು ಚಿಕಿತ್ಸೆಯ ಸಾಮಾನ್ಯ ದಾರಿಯಾಗಿದ್ದರೂ, ನೀವು ಇನ್ಸುಲಿನ್ ಇನ್ಹೇಲರ್ ಅನ್ನು ಬಳಸಬಹುದು. ಇನ್ಹೇಲರ್ ನಿಂದ ಇನ್ಸುಲಿನ್ ಪುಡಿಯನ್ನು ನಿಮ್ಮ ಬಾಯಿಯ ಮೂಲಕ ಶ್ವಾಸಕೋಶಕ್ಕೆ ಕಳುಹಿಸಬಹುದು.

ಮಾತ್ರೆ ರೂಪದ ಇನ್ಸುಲಿನ್ ತಯಾರು ಮಾಡುವಲ್ಲಿ ವಿಜ್ಞಾನಿಗಳು ಪ್ರಯತ್ನಿಸುತ್ತಿದ್ದಾರೆ. ಆದರೆ ಇದಿನ್ನೂ ಕ್ಲಿನಿಕಲ್ ಪ್ರಯೋಗದ ಹಂತದಲ್ಲಿದೆ.

ನೀವು ಎಷ್ಟು ಬಾರಿ ಇನ್ಸುಲಿನ್ ತೆಗೆದುಕೊಳ್ಳಬೇಕು?

ನಿಮ್ಮ ಅವಶ್ಯಕತೆಗಳ ಆಧಾರದ ಮೇಲೆ, ನೀವು ಎಷ್ಟು ಬಾರಿ ಇನ್ಸುಲಿನ್ ತೆಗೆದುಕೊಳ್ಳಬೇಕು ಎಂದು ನಿಮ್ಮ ವೈದ್ಯರು ನಿರ್ಧರಿಸುತ್ತಾರೆ. ಸಾಮಾನ್ಯವಾಗಿ, ನಿಮ್ಮ ಹಿನ್ನೆಲೆ ಇನ್ಸುಲಿನ್ ಅನ್ನು ನಿಯಂತ್ರಣದಲ್ಲಿಡಲು, ದಿನವಿಡೀ ನಿರಂತರವಾಗಿ ಕಡಿಮೆ ಮಟ್ಟದ ಇನ್ಸುಲಿನ್ ಒದಗಿಸಲು ನಿಮಗೆ ದಿನಕ್ಕೆ ಒಂದು ಅಥವಾ ಎರಡು ಬಾರಿ ಬೇಸಲ್ ಇನ್ಸುಲಿನ್ ಇಂಜೆಕ್ಷನ್ ಅಗತ್ಯವಿರುತ್ತದೆ. ನಿಮ್ಮ ದೇಹದ ಅವಶ್ಯಕತೆಗೆ ಅನುಗುಣವಾಗಿ ನಿರಂತರ ಔಷಧವನ್ನು ಒದಗಿಸುವ ಇನ್ಸುಲಿನ್ ಪಂಪನ್ನು ಸಹ ನೀವು ಬಳಸಬಹುದು. ನಿಮ್ಮ ಆಹಾರದಲ್ಲಿನ ಸಕ್ಕರೆಯನ್ನು ಸರಿದೂಗಿಸಲು ಬೋಲಸ್ ಇನ್ಸುಲಿನ್ ಅನ್ನು ನಿಮ್ಮ ಊಟಕ್ಕಿಂತ ಮುಂಚೆ ತಗೆದುಕೊಳ್ಳಬೇಕು.

ನಿಮಗೆ ಟೈಪ್ 1 ಡಯಾಬಿಟಿಸ್ ಇದ್ದರೆ, ನಿಮಗೆ ಬೇಸಲ್ ಇನ್ಸುಲಿನ್ ಡೋಸ್‍ನ ಜೊತೆಗೆ ಪ್ರತಿದಿನ ಬೋಲಸ್ ಇನ್ಸುಲಿನ್ ಚುಚ್ಚುಮದ್ದು ಬೇಕಾಗಬಹುದು ಅಥವಾ ಚರ್ಮದಿಂದ ನಿರಂತರವಾಗಿ ಇನ್ಸುಲಿನ್ ಒಳಸೇರಿಸಬೇಕಾಗಬಹುದು. ನಿಮಗೆ ಟೈಪ್ 2 ಡಯಾಬಿಟಿಸ್ ಇದ್ದರೆ, ನಿಮಗೆ ದಿನಕ್ಕೆ ಒಂದು ಚುಚ್ಚುಮದ್ದು ಅಥವಾ ಹಲವು ಚುಚ್ಚುಮದ್ದುಗಳು ಬೇಕಾಗಬಹುದು. ನಿಮಗೆ ಬೆಸಲ್ ಇನ್ಸುಲಿನ್ ಬದಲಿ ಅಥವಾ ಬೋಲಸ್ ಇನ್ಸುಲಿನ್ ಬದಲಿ ಬೇಕಾಗಬಹುದು ಇಲ್ಲವೇ ಎರಡೂ ಬೇಕಾಗಬಹುದು ಅಥವಾ ನಿಮ್ಮ ಸಕ್ಕರೆ ನಿಯಂತ್ರಣದ ಸ್ಥಿತಿಯ ಮೇಲೆ ನಿರಂತರವಾಗಿ ಇನ್ಸುಲಿನ್ ಒಳಸೇರಿಸಬೇಕಾಗಬಹುದು.

ಸಾಮಾನ್ಯವಾಗಿ, ಇನ್ಸುಲಿನ್ ಚಿಕಿತ್ಸೆಯಲ್ಲಿ, ನಿಮಗೆ ನೀಡಲಾಗುವ ಅಥವಾ ಬಾಯಿಯ ಮೂಲಕ ತಗೆದುಕೊಳ್ಳುತ್ತಿರುವ ಔಷಧಿಯ ಜೊತೆಗೆ ಒಂದು ಡೋಸ್ ಬೇಸಲ್ ಇನ್ಸುಲಿನ್ ನೀಡುವುದರ ಮೂಲಕ ಶುರುಮಾಡಲಾಗುತ್ತದೆ.

ಇನ್ಸುಲಿನ್ ಶೇಖರಿಸುವ ಸರಿಯಾದ ವಿಧಾನ ಯಾವುದು?

ಇನ್ಸುಲಿನ್ ಅನ್ನು ಸರಿಯಾಗಿ ಸಂಗ್ರಹಿಸಲು ಕೆಲವು ಸಲಹೆಗಳು ಇಲ್ಲಿವೆ:

  • ತೆರೆಯದ ಬಾಟಲುಗಳನ್ನು ಮುಕ್ತಾಯ ದಿನಾಂಕದವರೆಗೆ ರೆಫ್ರಿಜರೇಟರ್‌ನಲ್ಲಿ ಸಂಗ್ರಹಿಸಿ.
  • ಚುಚ್ಚಿಕೊಳ್ಳುವ ಮೊದಲು ಬಾಟಲಿನ ತಾಪಮಾನವನ್ನು ಕೋಣೆಯ ತಾಪಮಾನಕ್ಕೆ ಬರಲು ಬಿಡಿ.
  • ತೆರೆದ ಬಾಟಲುಗಳನ್ನು ಕೋಣೆಯ ತಾಪಮಾನದಲ್ಲಿ ಒಂದು ತಿಂಗಳವರೆಗೂ ಇಡಬಹುದು. ಅದಾದ ನಂತರ ಬಿಸಾಡಿ.
  • ನಿಮ್ಮ ಇನ್ಸುಲಿನ್ ಅನ್ನು ವಿಪರೀತ ತಾಪಮಾನದಲ್ಲಿ ಸಂಗ್ರಹಿಸಬೇಡಿ. ಸೂರ್ಯನ ಬೆಳಕಿನಿಂದ ದೂರವಿಡಿ. ಹೆಪ್ಪುಗಟ್ಟಿಸಬೇಡಿ.
  • ಬಾಟಲ್‌ನ ಬಣ್ಣ, ಸ್ಪಷ್ಟತೆ ಮತ್ತು ವಾಸನೆಯಲ್ಲಿ ಬದಲಾವಣೆಗಳಾಗಿವೆಯೇ ಹಾಗು ನೀವು ಯಾವುದೇ ಬದಲಾವಣೆಗಳನ್ನು ಅದರಲ್ಲಿ ಗಮನಿಸಿದರೆ ಆ ಇನ್ಸುಲಿನ್ ಬಾಟಲನ್ನು ಬಳಸಬೇಡಿ.
  • ಅವಧಿ ಮೀರಿದ ಇನ್ಸುಲಿನ್ ಅನ್ನು ಬಳಸಬೇಡಿ.

ಇನ್ಸುಲಿನ್ ಚಿಕಿತ್ಸೆಯಿಂದ ಏನಾದರೂ ಅಡ್ಡಪರಿಣಾಮಗಳಿವೆಯೇ?

ಇನ್ಸುಲಿನ್ ಚುಚ್ಚುಮದ್ದಿನ ಅಡ್ಡಪರಿಣಾಮಗಳು ಸಾಮಾನ್ಯವಾಗಿಲ್ಲ. ಚುಚ್ಚುಮದ್ದು ಚುಚ್ಚಿದ ಜಾಗದಲ್ಲಿ ಕೆಂಪಾಗುವುದು, ಊತ ಮತ್ತು ತುರಿಕೆ ಅಥವಾ ನೋವನ್ನು ಉಂಟುಮಾಡಬಹುದು. ಆದರೆ ಈ ಚಿಹ್ನೆಗಳು ಸಾಮಾನ್ಯವಾಗಿ ಕೆಲವೇ ದಿನಗಳಲ್ಲಿ ಮಾಯಾವಾಗುತ್ತವೆ. ಅಪರೂಪದ ಸಂದರ್ಭಗಳಲ್ಲಿ, ನಿಮಗೆ ತೀವ್ರವಾದ ಅಲರ್ಜಿ ಆಗಬಹುದು.

ಅತಿ ಹೆಚ್ಚು ಅಥವಾ ಅತಿ ಕಡಿಮೆ ಇನ್ಸುಲಿನ್ ಬಯಸದ ಪರಿಣಾಮಗಳನ್ನು ಬೀರುತ್ತದೆ. ಹೆಚ್ಚು ಇನ್ಸುಲಿನ್ ರಕ್ತದಲ್ಲಿನ ಸಕ್ಕರೆ ಮಟ್ಟವನ್ನು ಅಪಾಯಕಾರಿ ಹಂತದವರೆಗೂ ಕಡಿಮೆ (ಹೈಪೊಗ್ಲೈಸೆಮಿಯಾ) ಮಾಡಬಹುದು, ತುಂಬಾ ಕಡಿಮೆ ಇನ್ಸುಲಿನ್ ನಿಮ್ಮ ರಕ್ತದಲ್ಲಿನ ಸಕ್ಕರೆ ಮಟ್ಟವನ್ನು ತುಂಬಾ ಹೆಚ್ಚಿಸಲು ಕಾರಣವಾಗುತ್ತದೆ (ಹೈಪರ್‌ಗ್ಲೈಸೆಮಿಯಾ).

ನೀವು ಇನ್ಸುಲಿನ್ ಚಿಕಿತ್ಸೆಯಲ್ಲಿರುವಾಗ ನಿಮ್ಮ ತೂಕ ಹೆಚ್ಚಾಗಬಹುದು. [9] ನಿಮ್ಮ ದೀರ್ಘಕಾಲದ ಸಕ್ಕರೆ ಕಾಯಿಲೆಯ ನಿಯಂತ್ರಣ ಕಳಪೆಯಾಗಿದ್ದರೆ ತೀವ್ರವಾದ ಇನ್ಸುಲಿನ್ ಚಿಕಿತ್ಸೆಯು ತಾತ್ಕಾಲಿಕವಾಗಿ ನಿಮ್ಮ ಡಯಾಬಿಟಿಕ್ ಕಣ್ಣಿನ ಕಾಯಿಲೆಯನ್ನು (ಡಯಾಬಿಟಿಕ್ ರೆಟಿನೋಪತಿ) ತೀವ್ರಗೊಳಿಸಬಹುದು.[10]

ನೀವು ಯಾವ ಮುನ್ನೆಚ್ಚರಿಕೆಗಳನ್ನು ತೆಗೆದುಕೊಳ್ಳಬೇಕು?

ನೀವು ಇನ್ಸುಲಿನ್‌ ತಗೆದುಕೊಳ್ಳುತ್ತಿರುವಾಗ ಕೆಲವು ವಿಷಯಗಳನ್ನು ನೆನಪಿನಲ್ಲಿಟ್ಟುಕೊಳ್ಳುವುದು ಬಹಳ ಮುಖ್ಯ:

  • ಸರಿಯಾದ ಚುಚ್ಚುಮದ್ದು ತಂತ್ರಗಳನ್ನು ಬಳಸಿ ಮತ್ತು ಇನ್ಸುಲಿನ್ ಅನ್ನು ಸೂಕ್ತ ಪ್ರಮಾಣದಲ್ಲಿ ಬಳಸಿ.
  • ಬಿಸಾಡಬಹುದಾದ ಸೂಜಿಗಳು ಮತ್ತು ಸಿರಿಂಜ್‍ಗಳನ್ನು ಬಳಸಿ ಮತ್ತು ಸೋಂಕಿನ ಯಾವುದೇ ಅಪಾಯವನ್ನು ತಪ್ಪಿಸಲು ಮರುಬಳಕೆ ಮಾಡಬಹುದಾದ ಯಾವುದೇ ಭಾಗಗಳನ್ನು ಸೋಂಕು ಮುಕ್ತಗೊಳಿಸಿ
  • ಪ್ರತಿ ಡೋಸನ್ನು ಚರ್ಮದ ತಾಜಾ ಅಥವಾ ಬಳಕೆಯಾಗದ ಜಾಗಕ್ಕೆ ಚುಚ್ಚುಮದ್ದು ನೀಡಿ
  • ರಕ್ತದಲ್ಲಿನ ಸಕ್ಕರೆ ಪ್ರಮಾಣ ಅಪಾಯಕಾರಿ ಮಟ್ಟದಲ್ಲಿ ಕಡಿಮೆ ಆಗಿರುವ (ಹೈಪೊಗ್ಲೈಸೆಮಿಯಾ) ಚಿಹ್ನೆಗಳಿಗಾಗಿ ಗಮನಿಸಿ
  • ನಿಮ್ಮ ಇನ್ಸುಲಿನ್ ಬಳಕೆ, ಕಾರ್ಬೋಹೈಡ್ರೇಟ್ ಸೇವನೆ ಮತ್ತು ವ್ಯಾಯಾಮವನ್ನು ಸಮತೋಲನಗೊಳಿಸಿ. ನಿಮ್ಮ ಕಾರ್ಬೋಹೈಡ್ರೇಟ್ ಸೇವನೆಯನ್ನು ಸ್ಥಿರವಾಗಿರಿಸಿ. ನಿಮ್ಮ ಆಹಾರದ ಮತ್ತು ದೈಹಿಕ ಚಟುವಟಿಕೆಯ ಮಾರ್ಪಾಡುಗಳೊಂದಿಗೆ ನೀವು ನಿಮ್ಮ ಇನ್ಸುಲಿನ್ ಪ್ರಮಾಣವನ್ನು ಹೊಂದಿಸಿಕೊಳ್ಳಬೇಕಾಗುತ್ತದೆ.
  • ಮದ್ಯ ಸೇವನೆಯು ಹೈಪೊಗ್ಲೈಸೆಮಿಯಾ ಅಪಾಯವನ್ನು ಹೆಚ್ಚಿಸುತ್ತದೆ [11]
  • ನೀವು ದೀರ್ಘಕಾಲದ ಆಸ್ತಮಾ ಅಥವಾ ಕ್ರಾನಿಕ್ ಅಬ್‌ಸ್ಟ್ರಕ್ಟಿವ್ ಪಲ್ಮನರಿ ಕಾಯಿಲೆಯಂತಹ ಶ್ವಾಸಕೋಶದ ಕಾಯಿಲೆ ಹೊಂದಿದ್ದರೆ ಇನ್ಹೇಲ್ಡ್ ಇನ್ಸುಲಿನ್ ಅನ್ನು ಶಿಫಾರಸು ಮಾಡಲಾಗುವುದಿಲ್ಲ [12]
  • ನೀವು ಧೂಮಪಾನ ಮಾಡುತ್ತಿದ್ದರೆ ಅಥವಾ ಇತ್ತೀಚೆಗೆ ಧೂಮಪಾನವನ್ನು ನಿಲ್ಲಿಸಿದ್ದರೆ ಇನ್ಹೇಲ್ಡ್ ಇನ್ಸುಲಿನ್ ಅನ್ನು ಬಳಸಬೇಡಿ[12]


    ಉಲ್ಲೇಖ:

    1. Vinik A. Advancing therapy in type 2 diabetes mellitus with early, comprehensive progression from oral agents to insulin therapy. Clin Ther. 2007 Jun;29(6 Pt 1):1236-53. Review. PubMed PMID: 18036387.
    2. American Diabetes Association (ADA) 2017 Guidelines http://care.diabetesjournals.org/content/diacare/suppl/2016/12/15/40.Supplement_1.DC1/DC_40_S1_final.pdf
    3. Husband DJ, Thai AC, Alberti KG. Management of diabetes during surgery with glucose-insulin-potassium infusion. Diabet Med. 1986 Jan;3(1):69-74. PubMed PMID: 2951140.
    4. Yki-Järvinen H, Esko N, Eero H, Marja-Riitta T. Clinical benefits and mechanisms of a sustained response to intermittent insulin therapy in type 2 diabetic patients with secondary drug failure. Am J Med. 1988 Feb;84(2):185-92. PubMed PMID: 3044067.
    5. Weng J, Li Y, Xu W, Shi L, Zhang Q, Zhu D, Hu Y, Zhou Z, Yan X, Tian H, Ran X, Luo Z, Xian J, Yan L, Li F, Zeng L, Chen Y, Yang L, Yan S, Liu J, Li M, Fu Z, Cheng H. Effect of intensive insulin therapy on beta-cell function and glycaemic control in patients with newly diagnosed type 2 diabetes: a multicentre randomised parallel-group trial. Lancet. 2008 May 24;371(9626):1753-60. doi: 10.1016/S0140-6736(08)60762-X. PubMed PMID: 18502299.
    6. Diabetes Control and Complications Trial Research Group, Nathan DM, Genuth S, Lachin J, Cleary P, Crofford O, Davis M, Rand L, Siebert C. The effect of intensive treatment of diabetes on the development and progression of long-term complications in insulin-dependent diabetes mellitus. N Engl J Med. 1993 Sep 30;329(14):977-86. PubMed PMID: 8366922.
    7. 7.http://www.diabetes.org/living-with-diabetes/treatment-and-care/medication/insulin/insulin-basics.html
    8. Swinnen SG, Hoekstra JB, DeVries JH. Insulin Therapy for Type 2 Diabetes. Diabetes Care. 2009;32(Suppl 2):S253-S259. doi:10.2337/dc09-S318.
    9. Russell-Jones D, Khan R. Insulin-associated weight gain in diabetes–causes, effects and coping strategies. Diabetes Obes Metab. 2007 Nov;9(6):799-812. Review. PubMed PMID: 17924864.
    10. Davis MD. Worsening of diabetic retinopathy after improvement of glycemic control. Arch Ophthalmol. 1998 Jul;116(7):931-2. PubMed PMID: 9682709.
    11. Arky RA, Veverbrants E, Abramson EA. Irreversible Hypoglycemia A Complication of Alcohol and Insulin. JAMA. 1968;206(3):575–578. doi:10.1001/jama.1968.03150030031006
    12. Ghosh S, Collier A. Inhaled insulins. Postgraduate Medical Journal. 2007;83(977):178-181. doi:10.1136/pgmj.2006.053868.

Loved this article? Don't forget to share it!

Disclaimer: The information provided in this article is for patient awareness only. This has been written by qualified experts and scientifically validated by them. Wellthy or it’s partners/subsidiaries shall not be responsible for the content provided by these experts. This article is not a replacement for a doctor’s advice. Please always check with your doctor before trying anything suggested on this article/website.