Reading Time: 2 minutes

ರಂಜಾನ್ ಇನ್ನೇನು ಹತ್ತಿರ ಬರುತ್ತಿದೆ, ಜಗತ್ತಿನಾದ್ಯಂತ ನೆಲೆಸಿರುವ ಮುಸ್ಲಿಮರು ಒಂದು ತಿಂಗಳ ಕಾಲ ಬೆಳಗಿನ ಜಾವದಿಂದ ಸಂಜೆ ಸೂರ್ಯ ಮುಳುಗುವವರೆಗೂ ಉಪವಾಸ ಮಾಡಲು ಸಿದ್ಧತೆ ನಡೆಸುತ್ತಿದ್ದಾರೆ. ಈ ಹೊತ್ತಿನಲ್ಲಿ, ಅವರ ಆಹಾರಕ್ರಮದ ದಿನಚರಿ ಬದಲಾಗಿ, ಸೂರ್ಯ ಹುಟ್ಟುವ ಮೊದಲು (ಸುಹೂರ್) ಹಾಗೂ ಸೂರ್ಯ ಮುಳುಗಿದ ಮೇಲೆ (ಇ‌ಫ್ತಾರ್) ಹೀಗೆ ದಿನಕ್ಕೆ ಎರಡು ಬಾರಿ ಮಾತ್ರ ಆಹಾರ ಸೇವಿಸುತ್ತಾರೆ. ಜೀವನಶೈಲಿಯಲ್ಲಿ ಆಗುವ ಇಂತಹ ದೊಡ್ಡ ಬದಲಾವಣೆ, ದೇಹದ ಬ್ಲಡ್ ಶುಗರ್ ಮಟ್ಟಗಳನ್ನು ಏರುಪೇರಾಗಿಸುವ ಅಪಾಯವನ್ನು ಹೆಚ್ಚಿಸಬಹುದು. ಅದು ಹೈಪರ್‌ಗ್ಲೈಸೀಮಿಯಾಕ್ಕೆ ಕಾರಣವಾಗಬಹುದು. ನಿಮಗೆ ಡಯಾಬಿಟಿಸ್ ಇದ್ದು, ರಂಜಾನ್ ಉಪವಾಸಕ್ಕೆ ಅಣಿಯಾಗುತ್ತಿದ್ದರೆ, ನಿಮಗೆ ಗೊತ್ತಿರಬೇಕಾದ ಕೆಲವು ಸಂಗತಿಗಳು ಇಲ್ಲವೆ.

ಹೈಪರ್‌ಗ್ಲೈಸೀಮಿಯಾ ಎಂದರೇನು?

ಅಧಿಕ ಬ್ಲಡ್ ಶುಗರ್ ಮಟ್ಟಕ್ಕೆ ಇರುವ ತಾಂತ್ರಿಕ ಹೆಸರು ಹೈಪರ್‌ಗ್ಲೈಸೀಮಿಯಾ ಆಗಿದೆ. ಖಾಲಿಹೊಟ್ಟೆಯ ಬ್ಲಡ್ ಶುಗರ್ ಮಟ್ಟ 125 mg/dL ಗಿಂತ ಹೆಚ್ಚಿದ್ದರೆ ಹಾಗೂ ಊಟವಾದ 2 ಗಂಟೆಗಳ ಬಳಿಕ ಅದು 180 mg/dL ಗಿಂತ ಹೆಚ್ಚಿದ್ದರೆ ಅದನ್ನು ಹೈಪರ್‌ಗ್ಲೈಸೀಮಿಯಾ ಎನ್ನುತ್ತಾರೆ.1 ಅಧಿಕ ಬ್ಲಡ್ ಶುಗರ್ ಮಟ್ಟ, ಮೂತ್ರದಲ್ಲಿ ಸಕ್ಕರೆ ಮಟ್ಟ ಹೆಚ್ಚಾಗುವುದು, ಆಗಾಗ ಮೂತ್ರಕ್ಕೆ ಹೋಗುವುದು ಹಾಗೂ ಬಾಯಾರಿಕೆ ಹೆಚ್ಚುವುದು, ಇವು ಹೈಪರ್‌ಗ್ಲೈಸೀಮಿಯಾ ರೋಗದ ಲಕ್ಷಣಗಳಾಗಿವೆ.2 ಟೈಪ್ 1 ಡಯಾಬಿಟಿಸ್ ರೋಗಿಗಳು ಉಪವಾಸದಲ್ಲಿ ಇದ್ದಾಗ ತೀವ್ರ ಹೈಪರ್‌ಗ್ಲೈಸೀಮಿಯಾಕ್ಕೆ ತುತ್ತಾಗುವ ಅಪಾಯ 3.2 ಪಟ್ಟು ಹೆಚ್ಚಿದ್ದರೆ, ಟೈಪ್ 2 ಡಯಾಬಿಟಿಸ್ ರೋಗಿಗಳಲ್ಲಿ ಇದು 5 ಪಟ್ಟು ಹೆಚ್ಚಾಗಿರುತ್ತದೆ.3 

ಡಯಾಬಿಟಿಸ್ ರೋಗಿಗಳಲ್ಲಿ ಪ್ರತಿ ದಿನ ಬ್ಲಡ್ ಶುಗರ್ ಮಟ್ಟ ಏರುಪೇರಾಗುತ್ತಿರುತ್ತದೆ. ಈ ಆರೋಗ್ಯ ಸ್ಥಿತಿಯನ್ನು ಸರಿಯಾದ ಆಹಾರ ಕ್ರಮ ಹಾಗೂ ಔಷಧಿಯ ದಿನಚರಿಯನ್ನು ಪಾಲಿಸುವುದರ ಮೂಲಕ ನೋಡಿಕೊಂಡರೆ, ಬ್ಲಡ್ ಶುಗರ್ ಮಟ್ಟ ಹಿಡಿತದಲ್ಲಿರುತ್ತದೆ. ಆದರೂ, ರಂಜಾನ್ ಹೊತ್ತಿನಲ್ಲಿ ಉಪವಾಸ ಮಾಡುವುದರಿಂದ ಆಗಾಗ ಬ್ಲಡ್ ಶುಗರ್ ಮಟ್ಟ ಏರುಪೇರಾಗುವಂತೆ ಮಾಡುತ್ತದೆ. ಅದರಲ್ಲೂ ಬೇಸಿಗೆ ಕಾಲದಲ್ಲಿ ಉಪವಾಸ ಮಾಡುವುದು ಇನ್ನೂ ಕಷ್ಟಕರವಾದ ಸನ್ನಿವೇಶವಾಗಿದೆ, ಏಕೆಂದರೆ ಈ ಕಾಲದಲ್ಲಿ ಉಪವಾಸ ಮಾಡಿದರೆ ದೇಹದ ನೀರಿನ ಮಟ್ಟ ಬೇಗನೆ ಇಳಿದುಹೋಗಿ ಡೀಹೈಡ್ರೇಶನ್‌ಗೆ ಕಾರಣವಾಗುವುದು.4  

ಅಪಾಯವೇಕೆ?

ಆಹಾರ ಕ್ರಮದ ದಿನಚರಿ

ಯಾವಾಗ ಹಾಗೂ ಏನನ್ನು ತಿನ್ನುತ್ತೀರಿ ಎಂಬುದು ನಿಮ್ಮ ಬ್ಲಡ್ ಶುಗರ್ ಮಟ್ಟದ ಮೇಲೆ ಪರಿಣಾಮ ಬೀರುತ್ತದೆ. ರಂಜಾನ್ ಹೊತ್ತಿನಲ್ಲಿ ಆಗುವ ಆಹಾರದ ಪ್ರಮಾಣ, ಗುಣಮಟ್ಟ ಹಾಗೂ ಆಹಾರ ತೆಗೆದುಕೊಳ್ಳುವ ಹೊತ್ತಿನಲ್ಲಿನ ಬದಲಾವಣೆಗಳು ದೇಹದ ಬ್ಲಡ್ ಶುಗರ್ ಮಟ್ಟವನ್ನು ಏರುಪೇರಾಗಿಸುತ್ತವೆ. ದಿನಕ್ಕೆ ಎರಡು ಬಾರಿ ಮಾತ್ರ ತಿನ್ನುವುದು, ಅದರಲ್ಲೂ 18-20 ಗಂಟೆಗಳ ಅಂತರದಲ್ಲಿ ತಿನ್ನುವುದು ನಿಮ್ಮ ಡಯಾಬಿಟಿಸ್ ಆರೈಕೆಯ ಯೋಜನೆಯ ಬುಡವನ್ನೇ ಅಲ್ಲಾಡಿಸಿಬಿಡುತ್ತದೆ.  

ಅದಕ್ಕೂ ಮಿಗಿಲಾಗಿ, ಬಾಯಲ್ಲಿ ನೀರೂರಿಸುವ ಇಫ್ತಾರ್ ಊಟದಲ್ಲಿ ಸಕ್ಕರೆ ಹಾಗೂ ಕಾರ್ಬ್‌ಗಳು ತುಂಬಿ ತುಳುಕುತ್ತಿರುತ್ತವೆ, ಅವು ದೇಹಕ್ಕೆ ಬೇಕಾದ ಶಕ್ತಿಯನ್ನು ಕೂಡಲೇ ಕೊಡುವುದಕ್ಕಾಗಿ ಇರುತ್ತವೆ. ಆದರೂ, ಈ ಹೊತ್ತಿನಲ್ಲಿ ಆಹಾರ ಕ್ರಮದ ಮೇಲಿನ ಹಿಡಿತ ಸಡಿಲವಾದರೆ ಹೈಪರ್‌ಗ್ಲೈಸೀಮಿಯಾದಂತಹ ತೊಂದರೆಗಳು ಎದುರಾಗಿ ನಿಮ್ಮ ಆರೋಗ್ಯ ಸ್ಥಿತಿ ಹದಗೆಡುವುದು. ಹಲವಾರು ಗಂಟೆಗಳ ಕಾಲ ಉಪವಾಸ ಮಾಡಿ, ಕ್ಯಾಲರಿ ಹೆಚ್ಚಿರುವ ಆಹಾರವನ್ನು ಕೂಡಲೇ ತಿಂದರೆ ಬ್ಲಡ್ ಶುಗರ್ ಮಟ್ಟ ಕೂಡಲೇ ಏರುವ ಸಾಧ್ಯತೆಗಳು ಹೆಚ್ಚಿರುತ್ತದೆ.  

ಔಷಧಿಗಳ ದಿನಚರಿ

ಡಯಾಬಿಟಿಸ್ ಇರುವ ಹೆಚ್ಚಿನವರು ತಾವು ಮಾಡುತ್ತಿರುವ ಉಪವಾಸಕ್ಕೆ ಹೊಂದಿಕೆಯಾಗುವ ಹಾಗೆ ತಮ್ಮ ಔಷಧಿಗಳ ದಿನಚರಿಯನ್ನು ಮಾರ್ಪಡಿಸಿಕೊಳ್ಳುತ್ತಾರೆ. ಉಪವಾಸ ಇರುವಾಗ ಹೈಪೋಗ್ಲೈಸೀಮಿಯಾ ಬರಬಹುದೆಂಬ ಹೆದರಿಕೆಯಲ್ಲಿ ಡಯಾಬಿಟಿಸ್ ಔಷಧಿಗಳನ್ನು ತುಂಬಾ ಕಡಿಮೆ ತೆಗೆದುಕೊಳ್ಳಲು ಹೊರಟಿರುತ್ತಾರೆ.3 ವೈದ್ಯಕೀಯ ಸಲಹೆ ಇಲ್ಲದೇ ಇಂತಹ ಮಾರ್ಪಾಟುಗಳನ್ನು ಮಾಡಿಕೊಂಡರೆ, ಅವು ಬ್ಲಡ್ ಶುಗರ್ ಮಟ್ಟದ ಏರುಪೇರಿಗೆ ಎಡೆಮಾಡಿಕೊಡುವವು.

ಏನು ಮಾಡಬೇಕು?

ಉಪವಾಸದಿಂದ ಉಂಟಾಗುವ ಅಪಾಯಗಳ ಕುರಿತು ತಿಳಿದುಕೊಂಡರೆ, ತೊಂದರೆಗಳನ್ನು ಕಡಿಮೆ ಮಾಡಿಕೊಳ್ಳಲು ನೀವು ಸನ್ನದ್ದರಾದಂತೆ. ಉಪವಾಸ ಮಾಡುವ ತೀರ್ಮಾನ ತೆಗೆದುಕೊಳ್ಳುವ ಮೊದಲು ನೆನಪಿನಲ್ಲಿಟ್ಟುಕೊಳ್ಳಬೇಕಾದ ಕೆಲವು ಅಂಶಗಳು ಇಲ್ಲಿವೆ. 

ಡಾಕ್ಟರೊಂದಿಗೆ ಮಾತನಾಡಿ: ಉಪವಾಸ ಮಾಡುವುದರಿಂದ ಆಗುವ ಅಪಾಯಗಳ ಕುರಿತು ನಿಮ್ಮ ಡಾಕ್ಟರೊಂದಿಗೆ ಮಾತನಾಡಿ. ಸಾಮಾನ್ಯವಾಗಿ, ಡಾಕ್ಟರ್ ನಿಮಗೆ ಅಪಾಯದ ಮುನ್ನೆಚ್ಚರಿಕೆಗೆ ಕೆಲವು ಪರೀಕ್ಷೆಗಳನ್ನು ಮಾಡಿಸಿಕೊಳ್ಳುವಂತೆ ಹೇಳಿ, ಬಳಿಕ ಅದಕ್ಕೆ ತಕ್ಕಂತೆ ಸಲಹೆ ನೀಡಬಹುದು.

ಮಾಹಿತಿ ಕಲೆಹಾಕಿ: ಡಾಕ್ಟರೊಂದಿಗೆ ಚರ್ಚಿಸಿದ ಬಳಿಕ ನೀವು ಉಪವಾಸ ಮಾಡಲು ತೀರ್ಮಾನಿಸಿದರೆ ಈ ಕೆಳಗಿನ ಅಂಶಗಳನ್ನು ನೆನಪಿನಲ್ಲಿಡಿ.5 

  1. ನಿಮ್ಮ ಆರೋಗ್ಯದ ಸ್ಥಿತಿಯನ್ನು ನಿರ್ವಹಿಸುವುದರ ಕುರಿತು ಪೂರ್ತಿಯಾಗಿ ತಿಳಿದುಕೊಂಡಿರಿ.
  2. ಆ ಒಂದು ತಿಂಗಳ ಕಾಲ ನಿಮ್ಮ ದೈನಂದಿನ ಚಟುವಟಿಕೆ, ಆಹಾರ ಕ್ರಮ, ಸಕ್ಕರೆ ಮಟ್ಟದ ಪರಿಶೀಲನೆ ಹಾಗೂ ಔಷಧಿಗಳಲ್ಲಿ ಯಾವೆಲ್ಲಾ ಬದಲವಾಣೆ ಮಾಡಿಕೊಳ್ಳಬೇಕೆಂದು ಮಾಹಿತಿ ಕಲೆಹಾಕಿ.
  3. ಹೈಪರ್‌ಗ್ಲೈಸೀಮಿಯಾದ ಯಾವುದೇ ಸೂಚನೆ ಹಾಗೂ ಲಕ್ಷಣಗಳ ಮೇಲೆ ಗಮನವಿರಿಸಿ.
  4. ಉಪವಾಸ ಮಾಡುವಾಗ ನಿಮ್ಮ ಬ್ಲಡ್ ಶುಗರ್ ಮಟ್ಟವನ್ನು ನಿಯಮಿತವಾಗಿ ಪರಿಶೀಲಿಸುತ್ತಿರಿ, ದಿನಕ್ಕೆ 2-3 ಬಾರಿ ಮಾಡುವುದು ಒಳಿತು.
  5. ಸಕ್ಕರೆ ಮಟ್ಟದ ರೀಡಿಂಗ್‌ಗಳಲ್ಲಿ ಏರುಪೇರಾಗಿದ್ದರೆ ಕೂಡಲೇ ಡಾಕ್ಟರನ್ನು ಭೇಟಿಮಾಡಿ ಇಲ್ಲವೇ ಸಾಧ್ಯವಾದರೆ ಉಪವಾಸ ಕೈಬಿಡಿ. ನಿಮ್ಮ ಆರೋಗ್ಯ ಸ್ಥಿತಿ ಸುಧಾರಿಸಿದ ಮೇಲೆ ಬೇರೊಂದು ದಿನ ಉಪವಾಸ ಮಾಡಬಹುದು.

 ಡಯಾಬಿಟಿಸ್ ಇರುವವರು ಉಪವಾಸ ಮಾಡಿದರೆ ಅದು ಏಕೆ ಹಾಗೂ ಹೇಗೆ ಹೈಪರ್‌ಗ್ಲೈಸೀಮಿಯಾಕ್ಕೆ ಕಾರಣವಾಗುತ್ತದೆ ಎಂದು ಈಗ ನೀವು ತಿಳಿದಿದ್ದೀರಿ. ಉಪವಾಸ ಮಾಡುವ ತೀರ್ಮಾನ ತೆಗೆದುಕೊಳ್ಳುವ ಮೊದಲು ಹಾಗೂ ಬಳಿಕ ವಹಿಸಬೇಕಾದ ಎಚ್ಚರಿಕೆಗಳ ಮೇಲೆ ಗಮನವಿರಲಿ. ನಿಮ್ಮ ಎಲ್ಲಾ ಆಗುಹೋಗುಗಳು ಡಾಕ್ಟರಿಗೆ ಗೊತ್ತಿರಲಿ. ರಂಜಾನ್‌ನ ಶುಭಾಶಯಗಳು!! 

References:

  1.   Mouri MI. Hyperglycemia [Internet]. StatPearls [Internet]. U.S. National Library of Medicine; 2020 [cited 2020Mar9]. Available from: https://www.ncbi.nlm.nih.gov/books/NBK430900/
  2. Hyperglycemia (High Blood Glucose) [Internet]. Hyperglycemia (High Blood Glucose) | ADA. [cited 2020Mar5]. Available from: https://www.diabetes.org/diabetes/medication-management/blood-glucose-testing-and-control/hyperglycemia
  3. Raveendran AV, Zargar AH. Diabetes control during Ramadan fasting. Cleveland Clinic Journal of Medicine. 2017Jan;84(5):352–6.
  4.   Almalki MH, Alshahrani F. Options for Controlling Type 2 Diabetes during Ramadan. Frontiers in Endocrinology. 2016;7.
  5. Beshyah S. IDF-DAR practical guidelines for management of diabetes during ramadan. Ibnosina Journal of Medicine and Biomedical Sciences. 2016;8(3):58.

Loved this article? Don't forget to share it!

Disclaimer: The information provided in this article is for patient awareness only. This has been written by qualified experts and scientifically validated by them. Wellthy or it’s partners/subsidiaries shall not be responsible for the content provided by these experts. This article is not a replacement for a doctor’s advice. Please always check with your doctor before trying anything suggested on this article/website.