ತಜ್ಞರಿಂದ ವಿಮರ್ಶೆ – ಅಶ್ವಿನಿ ಎಸ್.ಕಾನಡೆ, ನೋಂದಾಯಿತ ಡಯಟಿಶಿಯನ್ ಮತ್ತು ಪ್ರಮಾಣೀಕೃತ ಡಯಾಬಿಟೀಸ್ ಶಿಕ್ಷಕರು. ಇವರಿಗೆ 17 ವರ್ಷಗಳ ಅನುಭವವಿದೆ
ಸತ್ಯಾಂಶ ಪರೀಕ್ಷಿಸಿದವರು – ಆದಿತ್ಯ ನಾರ್, ಬಿ.ಫಾರ್ಮ್, ಎಂ.ಎಸ್‌ಸಿ. ಸಾರ್ವಜನಿಕ ಆರೋಗ್ಯ ಮತ್ತು ಆರೋಗ್ಯ ಅರ್ಥಶಾಸ್ತ್ರ
ಬಹುಶಃ ನೀವೇ ಇದನ್ನು ಬಳಸಿರಬಹುದು, ಅಥವ ಯಾರಾದರೂ ಇದರ ಕುರಿತು ಮಾತನಾಡುವುದನ್ನು ಕೇಳಿರಬಹುದು ಅಥವಾ ಅದನ್ನು ಸ್ನೇಹಿತರು ಅಥವಾ ಸಂಬಂಧಿಕರು ನಿಮಗೆ ಸೂಚಿಸಿರಬಹುದು, ಒಟ್ಟಿನಲ್ಲಿ ಮೆಂತ್ಯ ಕಾಳುಗಳು ಡಯಾಬಿಟಿಕ್‌ಗಳಿಗೆ ಒಳ್ಳೆಯದು ಎಂಬುದು ನಮ್ಮಲ್ಲಿ ಬಹುತೇಕರಿಗೆ ತಿಳಿದಿದೆ.
ಆದರೆ ಈ ಕಹಿಯಾದ ಕಾಳುಗಳು ಹಲವು ಡಯಾಬಿಟಿಕ್‌ಗಳಿಗೆ ಮನೆಮದ್ದಾಗಿರುವುದಾದರು ಹೇಗೆ? ಬನ್ನಿ ತಿಳಿದುಕೊಳ್ಳೋಣ.
ಡಯಾಬಿಟಿಸ್ ನಿರ್ವಹಿಸಲು ಮೆಂತ್ಯ ಕಾಳುಗಳು
ಮೆಂತ್ಯ ಕಾಳಿನಲ್ಲಿ ನಾರಿದ್ದು ಅದು ನಿಮ್ಮ ಜೀರ್ಣಕ್ರಿಯೆಯನ್ನು ನಿಧಾನಗೊಳಿಸಲು, ನಿಮ್ಮ ದೇಹವು ಸಕ್ಕರೆಯನ್ನು ಹೀರಿಕೊಳ್ಳುವ ಪ್ರಮಾಣವನ್ನು ಕಡಿಮೆ ಮಾಡಲು ಸಹಾಯ ಮಾಡುತ್ತದೆ ಮತ್ತು ನಿಮ್ಮ ದೇಹವು ಬಿಡುಗಡೆ ಮಾಡುವ ಇನ್ಸುಲಿನ್ ಪ್ರಮಾಣವನ್ನು ಹೆಚ್ಚಿಸುತ್ತದೆ.
ಅವು ಕರಗಬಲ್ಲ ನಾರಿನಾಂಶದ ಉತ್ತಮ ಮೂಲವಾಗಿದೆ ಮತ್ತು ಗ್ಯಾಲಕ್ಟೋಮನ್ನನ್ ಅನ್ನು ಹೊಂದಿದೆ, ಇದು ಜೀರ್ಣಕ್ರಿಯೆಯ ವೇಗವನ್ನು ಕಡಿಮೆ ಮಾಡಲು ಸಹಾಯಕವಾಗುತ್ತದೆ ಮತ್ತು ದೇಹದಲ್ಲಿನ ಕಾರ್ಬೋಹೈಡ್ರೇಟ್‌ಗಳ ಹೀರಿಕೊಳ್ಳುವಿಕೆಯನ್ನು ಮತ್ತು ನಿಮ್ಮ ರಕ್ತದಲ್ಲಿನ ಸಕ್ಕರೆ ಮಟ್ಟವನ್ನು ಕಡಿಮೆ ಮಾಡಲು ಸಹಾಯ ಮಾಡುತ್ತದೆ ಮತ್ತು ನಿಮ್ಮ ಒಟ್ಟಾರೆ ಗ್ಲೂಕೋಸ್ ಸಹಿಷ್ಣುತೆಯನ್ನು ಸುಧಾರಿಸುತ್ತದೆ.[1]
ಇದಲ್ಲದೆ, ಇದು ದೇಹದ ಇನ್ಸುಲಿನ್ ಸ್ರವಿಸುವಿಕೆಯನ್ನು ಮತ್ತು ಇನ್ಸುಲಿನ್‌ನ ಸಂವೇದನೆಯನ್ನೂ ಸಹ ಸುಧಾರಿಸುತ್ತದೆ, ಇದು ಟೈಪ್ 1 ಮತ್ತು ಟೈಪ್ 2 ಡಯಾಬಿಟಿಸ್ ಮೆಲ್ಲಿಟಸ್ ಅನ್ನು ಉತ್ತಮವಾಗಿ ನಿರ್ವಹಿಸಲು ಸಹಾಯ ಮಾಡುತ್ತದೆ.[2]
ಹಾಗಾದರೆ, ಈ ನೈಸರ್ಗಿಕ ಮದ್ದನ್ನು ಬಳಸಲು ಉತ್ತಮ ಮಾರ್ಗ ಯಾವುದು?
ಒಂದು ಅಧ್ಯಯನದಲ್ಲಿ, ಟೈಪ್ 2 ಡಯಾಬಿಟಿಸ್ ಇರುವ 24 ಮಂದಿ ಭಾಗಿದಾರರಿಗೆ ಪ್ರತಿದಿನ 10 ಗ್ರಾಂ ಎಂಟು ಗಂಟೆಗಳ ಕಾಲ ಬಿಸಿ ನೀರಿನಲ್ಲಿ ನೆನೆಸಿದ ಮೆಂತ್ಯದ ಕಾಳುಗಳನ್ನು ನೀಡಲಾಯಿತು. ಈ ಪ್ರಯೋಗದ ಕೊನೆಯಲ್ಲಿ, ಅವರ ರಕ್ತದಲ್ಲಿನ ಸಕ್ಕರೆಯ ಮಟ್ಟದಲ್ಲಿ ಗಮನಾರ್ಹ ಸುಧಾರಣೆ ಕಂಡುಬಂದಿತು ಹಾಗೂ ಮೆಂತ್ಯದ ಕಾಳುಗಳನ್ನು ಬಿಸಿನೀರಿನಲ್ಲಿ ನೆನೆಸಿದ್ದರಿಂದ ಅವರ ದೇಹದ ರಕ್ತದಲ್ಲಿನ ಸಕ್ಕರೆಯ ಮಟ್ಟವನ್ನು ಕಡಿಮೆ ಮಾಡಲು ಸಹಾಯ ಮಾಡಿದೆ ಎಂಬುದು ಬೆಳಕಿಗೆ ಬಂದಿತು.[3]
ಡಯಾಬಿಟಿಸ್‌ಅನ್ನು ನಿರ್ವಹಿಸಲು ನೆರವಾಗುವ ಇನ್ನೂ ಕೆಲವು ಮನೆಮದ್ದುಗಳ ಕುರಿತು ಓದಿರಿ
ಡಯಾಬಿಟಿಸ್‌ಗೆ ಮೆಂತ್ಯದ ಕಾಳುಗಳನ್ನು ಬಳಸುವ ಒಂದು ಸರಳ ವಿಧಾನವೆಂದರೆ ಅದನ್ನು ಬಿಸಿ ನೀರಿನಲ್ಲಿ ನೆನೆಸಿ ನಂತರ ಅದನ್ನು ಸೇವಿಸುವುದು. ನೀವು ಅದನ್ನು ರಾತ್ರಿಯಿಡೀ ನೆನೆಸಿಟ್ಟು, ಬೆಳಿಗ್ಗೆ ಅದರ ನೀರನ್ನು ಕುಡಿಯಬಹುದು, ಮತ್ತು ಅದರ ಕಾಳುಗಳನ್ನು ವಿವಿಧ ಅಡುಗೆಗಳಲ್ಲಿ ಬಳಸಬಹುದು. ಅಥವಾ, ಈ ಕಾಳುಗಳಿಂದ ಹೆಚ್ಚಿನ ಲಾಭವನ್ನು ಪಡೆಯಲು ಮೆಂತ್ಯದ ಕಾಳನ್ನು ನಿಮ್ಮ ಅಡುಗೆಯಲ್ಲಿ ಬಳಸುವ ಮುನ್ನ ಕನಿಷ್ಠ ಮೂರು ಅಥವಾ ನಾಲ್ಕು ಗಂಟೆಗಳ ಕಾಲ ಬಿಸಿ ನೀರಿನಲ್ಲಿ ನೆನೆಸಿಡಿ.
ರುಚಿಕರ ಮತ್ತು ಆರೋಗ್ಯಕರ ಮೆಂತ್ಯದ ಪಾಕವಿಧಾನಗಳು
1. ಮೆಂತ್ಯ ಮತ್ತು ಓಟ್ಸ್‌ನ ರೊಟ್ಟಿ
ಓಟ್ಸ್‌ನಲ್ಲಿ ಫೈಬರ್ ಅಂಶವು ಹೆಚ್ಚಾಗಿದ್ದು, ಕಡಿಮೆ ಗ್ಲೈಸೆಮಿಕ್ ಸೂಚ್ಯಂಕವನ್ನು ಹೊಂದಿದೆ. ಹಾಗಾಗಿ, ಇದನ್ನು ಮೆಂತ್ಯದೊಂದಿಗೆ ಬೆರೆಸುವುದು ಒಂದು ಉತ್ತಮ ಆಯ್ಕೆ.
ಕೃಪೆ: ಯೂಟ್ಯೂಬ್/ಸ್ಪೀಕ್ ಹೆಲ್ತ್
2. ಮೆಂತ್ಯ ಮತ್ತು ಓಟ್ಸ್‌ನ ಕಡುಬು
ಮೆಂತ್ಯದ ಪ್ರಯೋಜನವನ್ನು ಓಟ್ಸ್‌ನೊಂದಿಗೆ ಪಡೆಯಲು ಮತ್ತೊಂದು ರುಚಿಕರ ಪಾಕವಿಧಾನ ಇಲ್ಲಿದೆ.
ಕೃಪೆ: ಯೂಟ್ಯೂಬ್/ತರ್ಲ ದಲಾಲ್‌
ಮೆಂತ್ಯದ ಕಾಳನ್ನು ಪುಡಿ ಮಾಡಿ ಬಳಸುವುದರಿಂದ ರಕ್ತದಲ್ಲಿನ ಗ್ಲೂಕೋಸ್ ಮಟ್ಟವನ್ನು ನಿಯಂತ್ರಿಸಬಹುದಾಗಿದೆ, ಆದರೆ ಈ ಕಾಳುಗಳಿಂದ ಹೆಚ್ಚಿನ ಪ್ರಯೋಜನಗಳನ್ನು ಪಡೆಯುವ ಒಳ್ಳಯ ವಿಧಾನವೆಂದರೆ ಅವುಗಳನ್ನು ಬಿಸಿ ನೀರಿನಲ್ಲಿ ನೆನೆಸಿ ನಂತರ ನಿಮ್ಮ ಅಡುಗೆಗಳಲ್ಲಿ ಬಳಸುವುದು.[4]
ಮೆಂತ್ಯದ ಕಾಳುಗಳನ್ನು ಬಿಸಿನೀರಿನಲ್ಲಿ ನೆನೆಸಿ ಯಾವುದಾದರೂ ಅಡುಗೆಗಳಲ್ಲಿ ಬಳಸಲು ನೀವು ಪ್ರಯತ್ನಿಸಿದ್ದೀರಾ? ಹೌದು ಎಂದಾದರೆ, ನಿಮ್ಮ ಸಲಹೆಗಳನ್ನು ಇತರೆ ಓದುಗರೊಂದಿಗೆ ಇಲ್ಲಿ ಹಂಚಿಕೊಳ್ಳಿ.
ಉಲ್ಲೇಖಗಳು:
[1] Sharma RD, Raghuram TC, Rao NS. Effect of fenugreek seeds on blood glucose and serum lipids in type I diabetes. Eur J Clin Nutr. 1990 Apr;44(4):301-6. PubMed PMID: 2194788.
[2] Kumar P, Bhandari U, Jamadagni S. Fenugreek Seed Extract Inhibit Fat Accumulation and Ameliorates Dyslipidemia in High Fat Diet-Induced Obese Rats. BioMed Research International. 2014;2014:606021. doi:10.1155/2014/606021.
[3] Kassaian N, Azadbakht L, Forghani B, Amini M. Effect of fenugreek seeds on blood glucose and lipid profiles in type 2 diabetic patients. Int J Vitam Nutr Res. 2009 Jan;79(1):34-9. doi: 10.1024/0300-9831.79.1.34. PubMed PMID: 19839001.
[4] Kassaian N, Azadbakht L, Forghani B, Amini M. Effect of fenugreek seeds on
blood glucose and lipid profiles in type 2 diabetic patients. Int J Vitam Nutr
Res. 2009 Jan;79(1):34-9. doi: 10.1024/0300-9831.79.1.34. PubMed PMID: 19839001.
